Táctil resonancia. Da derrota dun esplendoroso veleiro, as voces flotantes e os cantos das baleas

Discurso lido no acto da súa recepción pola ilustrísima señora dona Ana Romaní e resposta da excelentísima señora dona Margarita Ledo Andión. O solemne acto académico no que foron lidos os dous discursos recolleitos no presente volume celebrouse o 6 de abril de 2019 no Teatro Coliseo Noela, de Noia.

A poeta e xornalista, natural de Noia, convocou a Xohana Torres e a Avilés de Taramancos como referentes no seu espertar poético, xunto a outras autoras das letras galegas e ás mulleres invisibilizadas, posuidoras de saberes compartidos e ignorados pero imprescindibles. A súa alocución é unha ollada ao mundo desde o feminismo e o comunal e colectivo que, fronte á “xordeira”, reivindica a dignidade da escoita no literario e no xornalismo.