Diccionario de Fole

A Real Academia Galega estableceu 1997 como o ano dedicado a Ánxel Fole. Non podía aparecer máis oportunamente este Diccionario, que recolle os estudos críticos, as teorizacións máis ou menos eruditas, as precisións cronolóxicas, todo un vocabulario e un censo de admiradores, de amigos, de devotos do escritor lugués e dos lugares polos que andou. O Diccionario é unha produción non só necesaria senón, asemade, ateigada de suxestións, de multitude de datos sobre o noso narrador, de listas de individuos reais ou ficticios que, dalgunha maneira, tiveron contacto coa humanidade do sobranceiro. Esta obra proporciona unha útil ferramenta de traballo para coñecer a Fole a través de recordos, anécdotas, opinións etc.