Dicionario castelán-galego da Real Academia Galega

Os 25 000 artigos lexicográficos que compoñen esta obra que presentamos, ademais dunha ampla información semántica, gramatical e ata fonética, ofrecen unha novidade subliñable como é a recollida das locucións e frases feitas máis comúns no noso idioma. Sabido é que son estes modismos, intraducibles literalmente a outros idiomas, os que mellor caracterizan o discurso autóctono. A recuperación desta información, tan esquecida e acurrunchada polos falantes, será, sen dúbida, de grande utilidade no futuro.