Emilia Pardo Bazán, pioneira do xénero negro

No 175 aniversario do nacemento de Emilia Pardo Bazán, a Real Academia Galega e a Casa-Museo queren revisitar unha dimensión especialmente moderna e suxestiva da súa obra: o seu papel pioneiro na incorporación do crime, da investigación e da mirada social á narrativa do seu tempo.

Os textos reunidos neste volume —La gota de sangre, Un destripador de antaño e El indulto— amosan distintas posibilidades literarias do crime, da sospeita, da investigación e da tensión moral. Neles, o delito non é unicamente o motor da intriga, senón tamén un indicio, unha fenda e unha revelación: permite observar os conflitos dunha época e explorar as emocións que atravesan a violencia, a culpa, o medo, a superstición, a impunidade ou a procura da xustiza. Publicar de novo estes textos supón, por tan¬to, volver sobre unha autora que soubo empregar o crime para iluminar as zonas máis escuras da sociedade.